الغلا شئ من الله

ياحمامه طاح غصنك وفارقك الامان،،
.............................. ابتدا خوفك وفارقني الغصن الندي


التَوَتْ بك مر الايام والتوديع حان،،
.............................ترقبين الغصن ويخونك الحظ الردي..


الحزن موّال جرحه على صوتك يبان،،
..............................والتعب والهم والخوف حادينك حدي..


كل ماأوحيتك تونين بالصوت الليّان،،

.............................انتي تجرين ونّه ،، وانا معك ابـــتدي..


من مغيب الشمس لين ارتفع صوت الاذان،،
........................غربةٍ تطوي ضلوعي وليلٍ يحتـــــــــدي..


اتنزح عن مكاني واجي نفس المكان،،
............................كني اللي ضاعت اخطاه ويخاف يغدي ..


افترقنــا،،والمقادير مامنها ضمان ،،
.............................حالة الدنيا وقصّر عن الدرب اجهدي..


ان نسيته له بقلبي شواهيد وكيان،،
.............................وان سريته حلم ليل،،وخيالٍ سرمدي..


آآآه لو يدري وش اللي عقب فرقاه كان ،،
..............................ماتوّصى دمع عيني ،، وصحى مرقدي..


ولو يحس بلوعة الظلم يمكن مااستهان،،
.............................واتقى دمعــــة وداعي وشرهة موعدي..


ولو ذكر ماكل قلبٍ يبي يرضى الهوان،،
..............................قدّر انه مايساوم على العزّ اجـــــودي..


انتهيـنا والتفاريـق من طبع الزمـــــان،،
.............................كل عينٍ ترقيب سهيل من عقب الجدي..


( وان بكيـــت وصار للدمــــع في عيني بيـان،،
...........................الغـــلا شيٍ من اللـه ،، ولاهو في يـــدّي ) !